ایک گماں کا حال ہے اور فقط گماں میں ہے

ایک گماں کا حال ہے اور فقط گماں میں ہے
کس نے عذابِ جاں سہا،کون عذابِ جاں میں ہے

لمحہ بہ لمحہ دم بہ دم آن بہ آن رم بہ رم
میں بھی گزشتگاں میں ہوں تُو بھی گزشتگاں میں ہے

آدم وذاتِ کبر یا کرب میں ہیں جُدا جُدا
کیا کہوں ان کا ماجرا جو بھی ہے امتحان میں ہے

شاخ سے اُڑگیا پرند ہے دلِ شامِ دردمند
صحن میں ہے ملال سا حُزن سا سماں میں ہے

خود بھی بے اماں ہوں میں،تجھ میں بھی بے اماں ہوں میں
کون سہے گا اس کا غم وہ جو میری اماں میں ہے

کیسا حساب کیا حساب حالت حال ہے عذاب
زخم نفس نفس میں ہے زہر اماں زماں میں ہے

اس کا فراق بھی زیاں اس کا وصال بھی زیاں
ایک عجیب کشمکش حلقہ بے دلاں میں ہے

بودو نبود کا حساب میں نہیں جانتا مگر
سارے وجود کی‘‘نہیں ’’میرے عدم کی‘‘ہاں’’میں ہے