Weshat-e-Dil ney kiya hai woh biyabaañ pedah
Sainkron kos nahin soorat-e-insaañ pedah

Dil key aainey meiñ kar johar-e-pinhaañ pedah
Dar-o-deewar sey ho soorat-e-janaañ pedah

Baagh sunsaan na kar inko pakarr kar sayyad
Baad muddat huwey haiñ murgh-e-khush’ilhaañ pedah

Ab qadam sey hai mere khana-e-zanjeer aabad
mujh ko wahdat ney kiya silsila-e-jumbaañ pedah

Rooh ki tarha sey daakhil ho jo deewana hai
Jism-e-khaaki samajh isko jo ho zindaañ pedah

Be’hijaaboñ ka magar shehr hai aqleem-e-adam
Daikhta hoon jissey hota hai woh uryaañ pedah

Ik gul aisa nahin howey na khizaañ jiski bahar
kon sey waqt huwa tha yeh gulistaañ pedah

Moojid us ki hai sayyah rozi hamari Aatish
ham na hotey to na hoti shab-e-hijraañ pedah