کلامِ ساغر: ایک نغمہ ایک تارا

کلامِ ساغر:   ایک نغمہ ایک تارا

ایک نغمہ ایک تارا ایک غنچہ ایک جام
اے غمِ دوراں! غمِ دوراں تجھے میرا سلام

زلف آوارہ، گریبان چاک، گھبرائی نظر
ان دنوں یہ ہے جہاں میں زندگانی کا نظام

چند تارے ٹوٹ کر دامن میں میرے آ گرے
میں نے پوچھا تھا ستاروں سے ترے غم کا مقام

کہہ رہے ہیں چند بچھڑے راہروں کے نقش پا
ہم کریں گے انقلاب جستجو کا اہتمام

پڑ گئیں پراہن صبح چمن پر سلوٹیں
یاد آ کر رہ گئی ہے بیخودی کی ایک شام

تیری عصمت ہو کہ ہو میری ہنر کی چاندنی
وقت کے بازار میں ہر چیز کے لگتے ہیں دام

ہم بنائیں گے یہاں ساغرؔ نئی تصویر شوق
ہم تخیل کے مجدد ہم تصور کے امام